Daniel 10

Paite Bible

Daniel’ Mengmuh Mi khat

10 PERSIA kumpipa Daria’ vaihawm kum, a kum thumna ah, Belteshazar kichi Daniel kiang ah kilaakna khat piakin a om hi. Tua kilaakna thupuak a dik a, kidouna thupi tawh kisai ahi. Mengmuhna tungtawn mahin tua mengmuhna thupuak theihsiamna amah kiang ah hong tung hi.

² Tua hun laiin, kei, Daniel nipikal thum sung dahna leh suunna neiin ka om a, ³ anlim ka ne kei a, zu in zong ka muk a sukha kei a, tua nipikal thum a bei mateng, nuhtheih bangmah zong ka kinuh het kei hi.

⁴ Tua kha, a ni 24 ni-in, tua Taigris lui lianpi geia ka din laiin, ⁵ ka khawdah leh, ka mai ah puanmalngat silh mi khat a om a, a kawng khamsiang hoiha kibawl kawnggakin a kigak hi. ⁶ A pumpi lah krusolait suang manpha a bang a, a maitang lah khawphia a bang a, a mitte lah meisel kuangpha a bang a, a baante leh a khete lah sumsan nawttet a bang a, a aw lah mi tampi awging a bang hi.

⁷ Tua mengmuh mu kei Daniel kia ka hi. Ka kianga om mite’n a mu kei uh a, ahihhangin, mulkimna in amaute a man a, a taikek uh a, a kibu uhi. ⁸ Kei kia-a nutsiatin ka om hi. Tha himhim ka nei kei a, ka maitang lah misi-a bangin a mual a, ka taang zou kei a, ⁹ ka muh mipa’ pau ka za a, ka ngaihkhiak leh, ka maia lei si-in nakpitakin ka ihmusuk huthut hi.

¹⁰ Khut khat in hon lawng a, ka khutte leh ka khukte-a kidomin

hon phong a, ka liing kawmkawm hi. ¹¹ Ama’n: Daniel aw, nang nakpitaka zahtaka ompa, na kianga ka gen ding thute pilvangtakin suut inla, dingtou in. Na kianga sawla ompa ka hi, a chi hi. Ka kianga hiai a gen takin, liing kawmkawmin ka dingtou hi.

¹² Tua khitin, ama’n hon houpih lai a: Daniel, lau ken. Theihsiamna ngah ding leh na Pathian’ maia kingainiam dinga lungsim na khentat ni masapen apan na thugente a kizata a, tuate dawnna-a kei hong pai ka hi. ¹³ Ahihhangin, Persia kumpigam makai ^[a] in ni 21 sung hon nang nilouh hi. Tua khitin, Persia kumpipa kianga tamdensaka ka om manin, makai lianpente laka khat Mikhael, kei huh dingin hong pai hi. ¹⁴ Tununga na mite tunga tung ding bang hi hiam, chih hilhchian dinga tu-a na kianga hong pai ka hi. Ahang bel, tua mengmuh pen hong tung ding, lah hong tung lou lai, tawh kisai hiven, a chi hi.

¹⁵ Hiai thu ka kianga a gen sungin, lei si-in ka kun a, pau theilouin ka om hi. ¹⁶ Tua khitin, mihing tawh kibangpa’n ka muk a lawng a, tuachi-in, ka kamka a, ka pau thei panta hi. Ka maia dingpa kiang ah: Mengmuh hangin, ka toupa aw, lungkham patauhnain ka dim a, thabeiin ka om hi. ¹⁷ Kei na sila in bangchi’n kon houpih thei dia oi, ka toupa aw. Ka tha bei a, nak nangawn nak theilou phial ka hi, ka chi hi.

¹⁸ Tua mihing tawh kibangpa’n hon lawngkik a, tha hon guan hi. ¹⁹ Ama’n: Nakpitaka zahtakpa mihing aw, lau kenla, khamuang in! Tu’n thahatta inla, hat in, hon chi hi.

Tua banga hon houpihtakin, hatsakin ka om a: Ka toupa aw, thahatna hon peta na hih chiangin, thu gen in, ka chi hi.

²⁰ Tuachi-in, ama’n: Na kianga ka hongna san na thei hia? Persia gam makai dou dingin ka kilehkik pah ding a, ka pai chiangin, Grik gam makai hong kuan ding. ²¹ Ahihhangin, a masain Thutak Laibu sunga kigelh nang kon hilh ding. Na makai Mikhael chih louhngal kuama’n amaute douin hon huh kei.