Ezekiel 11

Paite Bible

Israel Makaite tunga Thukhenna

11 TUA khitin, Kha in hon domkangtou a, Tangtawn Toupa’ inn kongpi tua suahlam nga ah hon tun hi. Tua kongpi lutna ah, pasal 25 a om uh a, amaute lak ah mipite’ makaite, Azur’ tapa Jaazania ^[a] leh Benaia’ tapa Pelatia ^[b] ka mu hi. ² Tangtawn Toupa’n ka kiang ah: Mihing’ tapa, hiaite ahi thil gilou sawm a, hiai khawpi a thuhilhna gilou pia. ³ Amaute’n: Innte lam hun tung pahta lou ding hia? Hiai khawpi lah sa huanna bel hi a, eite a sa hi ve hangin, chi uh ahi. ⁴ Tua bang ahih manin, amaute demin thu gen inla, mihing’ tapa aw, genkholhna thu gen in, a chi hi.

⁵ Tua khitin, Tangtawn Toupa’ Kha ka tung ah hong tung a, ama’n hiai gen dingin hon hilh hi: Hiai Tangtawn Toupa’ thugen ahi, ama’n: Israel innkawte aw, tua ahi na gen uh, ahihhangin, ke’n na lungsim uh ka thei. ⁶ Hiai khawpi sung ah mi tam semsem na that uh a, thahsatein a kongzingte na dimsak uh.

⁷ Tua bang ahih manin, Toupa’ Tangtawn Pathian thugen hiai ahi: Tua laia na paih uh thahsa luangte a sa hi a, hiai khawpi a huanna beel ahi. Ahihhangin, tua apanin noute kon hawlkhe ding. ⁸ Namsau na lau uh. Namsau ahi aw, na tung ua kon tut ding, chi-a Tangtawn Toupa’n phuang ahi. ⁹ Khawpi apan noute hon hawlkhe ding ing a, gamdang mite’ khutsunga hon pe ding ing a, noute tunga gawtna hon tun ding ka hi. ¹⁰ Namsaua puk ding uchin a, Israel gam mongte-a noute hon gawt ding ka hi. Tua hun chianga, kei Tangtawn Toupa ka hi, chih thei ding na hi uh. ¹¹ Hiai khawpi noute adingin anhuanna beel ahi kei ding a, noute zong a sunga sa na hi kei ding uh. Israel gam mongte-a na tung ua gawtna tun ding ka hi. ¹² Tua hun chiangin, kei Tangtawn Toupa ka hi, chih na thei ding uh. Ahang bel, ka danthusehte zui lou a, ka dante kem lou a, na kim na kiang ua namte’ tatdan zui zaw hi ve uchin, a chi hi.

¹³ Tua banga genkholhna thu ka gen laiin, Benaia’ tapa Pelatia a si hi. Tuachi-in leilam ngain ka bok a, aw ngaihtakin ka kikoukhia a: Maizen, Toupa Tangtawn Pathian! Israel khawsuaksunte nangawn beisak vek ding na hi tel-a hia? ka chi hi.

¹⁴ Tangtawn Toupa’ thu ka kiang ah hong tung a, ¹⁵ ama’n: Mihing’ tapa, na sanggamte tua sisana na kizoppih na sanggamte leh Israel innkawte khempeuh zaw, Jerusalema teengte’n: Amaute’n Tangtawn Toupa gamlat uhi. Hiai eite’ tan dinga piak ahi, a chihte uh ahi uhi.

Israel Kiknawnna Thuchiam

¹⁶ Tua bang ahih manin, Toupa Tangtawn Pathian’ thugen hiai ahi: Gamlapi ah namte lak ah amaute sawlmangin gam teng ah thehthangta mah leng, a va taamna gamte uah, keimah hun tomkha sung amaute adingin munsiangthou ka hi, chi ahi, chi in.

¹⁷ Tua bang ahih manin, Toupa’ Tangtawn Pathian thugen hiai ahi: Namte lak apan kon piikhe ding a, thehthanga na omna gamte uapan kon kaikhawm ding a, Israel’ gam ah kon koihkik ding, chi ahi,

chi in.

¹⁸ Amaute Israel gam ah hong kik ding uh a, a mannabei thilte leh a kihhuai milimte khempeuh a paimang ding uh. ¹⁹ Ke’n amaute lungtang kipumkhat ka pe ding a, amaute sung ah kha thak ka koih ding. A sa uapan a suang lungtang uh ka lakhe ding a, sa lungtang ka pe ding. ²⁰ Tua hun chiangin, ka danthusehte a zui ding uh a, ka dante a kemta ding uh a, a zuita ding uhi. Amaute ka mite ahi ding uh a, kei a Pathian uh ka hi ding. ²¹ Ahihhangin, mannabei milimte leh a kihhuai milimte lama lungtang pete bel, a thilhih uh, amaute lutung mah ka tusak ding, chi-a Toupa Tangtawn Pathian in phuang ahi, chi in, a chi hi.

²² Tua khitin, cherubte a kiang ua kangtalaipeite tawh, kha a zak uh a, Israel Pathian’ thupina, amaute tunglam ah a om hi. ²³ Tua khawpi sung apanin Tangtawn Toupa’ thupina a paitou a, suahlama mual tung ah a khawl hi. ²⁴ Kha in kei hon domkangtou a, Pathian’ Kha in mengmuh a hon piak Babulona saltangte kiang hon tun hi. Tua khitin, mengmuh ka muh in hon paitouhsan a, ²⁵ Tangtawn Toupa’n hon lahte khempeuh saltangte ka hilh hi.