Ezra 3

Paite Bible

Khalam Kisakkholhna

3 A KHA sagihna hong tun takin leh Israelte’n amau khawpi chiat a luah takun, mipite mi khat bang maiin Jerusalem ah hong kikhawm uhi. ² Tua ah, Jehozadak’ tapa Jeshua leh a siampi hihpihte leh Shealtiel’ tapa Zerubabel leh a sanggamte a kisa uh a, Israel Pathian’ maitam a dawh uhi. Tua bel, Pathian’ mipa Mosi’ dan banga haltum thillat a lat nading uh ahi. ³ A kim a pam ua mite lau mah le uh, maitam a suangphum tung ah a dawh uh

a, tua tung ah Tangtawn Toupa’ mai ah haltum thillatte, zingsang kithoihna leh nitak lam kithoihnate a laan uhi. ⁴ Tua baan ah, a kigelh bangbangin, Bawktate Ankuanglui ^[a] a bawl uh a, dan in ni khat zel adinga a ngiat zah, nisim haltum thillatte a laan uhi. ⁵ Tua khitin, haltum thillat ngeinate a laan uh a, Kha Thak thillatte, Tangtawn Toupa adinga seh siangthou ankuanglui thillatte leh Tangtawn Toupa ading ut thillatte a laan uhi. ⁶ Tangtawn Toupa’ tempul suangphum kiphum nai kei mah leh, a kha sagihna, a ni khat ni-in Tangtawn Toupa’ mai ah haltum thillatte a laan panta uhi.

Tempul Lamthakna

⁷ Tua khitin, suangsekte leh singsiamte kiang ah sum a pia uh a, Sidonte leh Turate kiang ah an leh dawn ding leh sathau a pia uhi. Tua bel, amaute’n Lebanon apan Jopa dong, Persia kumpipa’ thupiak banga tuipi tunga sidar singtumte hon puak nading uh ahi.

⁸ Jerusalema Pathian’ inn hong tun nung uh, a kum nihna, a kha nihna ah Shealtiel’ tapa Zerubabel, Jozadak’ tapa Jeshua leh a sanggam dangte uh, siampite leh Levite, saltanna apan Jerusalema hong kikte’n nasep a pan uh a, Levite kum 20 apan a tunglamte Tangtawn Toupa’ inn lam nasep enkai dingin a sep uhi. ⁹ Tuachi-in, Jeshua leh a tapate leh sanggamte, Kadmiel leh a tapate tua Hodavia’ suante leh Henadad leh a tapate leh sanggamte, a vek ua Levi suante hivek, tuate Pathian’ inn lamte enkaiin a pangkhawm uhi.

¹⁰ Inn lamte’n Tangtawn Toupa’ tempul suangphum a phum takun, siampite’ siampi puante silha, pengkulte tawiin, Levite, tua Asaf’ tapate, dak khutbette tawiin, Israel kumpipa David’ seh bangin, Tangtawn Toupa phat dingin amau mun chiat ah a om uhi. ¹¹ Phatna leh lungdamthu piain Tangtawn Toupa’ mai ah la a sa uh a:

Amah hoih hi,

Israel a itna in tangtawn daih hi,

a chi uhi. Tangtawn Toupa’ inn suangphum a kiphum manin, mipite khempeuh Tangtawn Toupa phatin nakpitakin a kikou uhi. ¹² Ahihhangin, tempul masa mukha siampite, Levite leh innkuan lutangte bel, hiai tempul suangphum lai mu mi tampite’ lungnop laitakin, nakpitakin a kap maimah uhi. ¹³ Mipite’ husa ngaih mahmah ahih manin lungnop aw leh kah aw kuama’n a khenkak thei kei hi.