Ezra 7

Paite Bible

Jerusalema Ezra

7 HIAITE nungin, Persia Kumpipa Arteksersa’ vaihawm laiin, Seraia’ tapa Ezra kichi a om hi. Seraia bel Azaria’ tapa ahi a, Azaria bel Hilkia’ tapa ahi a, ² Hilkia bel Shalum’ tapa ahi a, Shalum bel Zadok’ tapa ahi a, Zadok bel Ahitub’ tapa ahi a, ³ Ahitub bel Amaria’ tapa ahi a, Amaria bel Azaria’ tapa ahi a, Azaria bel Meraioth’ tapa ahi a, ⁴ Meraioth bel Buki’ tapa ahi a, ⁵ Buki bel Abishua’ tapa ahi a, Abishua bel Fineha’ tapa ahi a, Fineha bel Eleazar’ tapa ahi a, Eleasar lah siampi makai Aron’ tapa ahi. ⁶ Hiai Ezra bel Babulon apan hong pai ahi. Amah, Tangtawn Toupa, Israel Pathian’ piak Mosi’ Dan thei mahmaha sinsakpa ahi. Tangtawn Toupa, a Pathian’ khut in amah a ompih manin, a nget peuhmah kumpipa’n a pia hi. ⁷ Israelte pawlkhat zong siampite, Levite, Lasate, Kongpi ngakte leh Tempul sawltawlte telin, Jerusalem ah hong paitou uhi. Tua bel, Kumpipa Arteksersa’ vaihawm kum, a kum sagihna ah ahi.

⁸ Kumpipa’ vaihawm kum, a kum sagihna, a kha ngana ah Ezra, Jerusalem hong tung hi. ⁹ Tua kum a kha khatna, a ni khat ni-in Babulon apan hong kipankhia a, a Pathian’ hehpihna khut in amah ompih ahih manin, a kha ngana, a ni khat ni-in Jerusalem hong tung hi. ¹⁰ Ezra bel, Tangtawn Toupa’ Dan suuta, zang a, Israela tua dan thusehte leh dante sinsakna-a kipumpiak a hih mana a Pathian in ompih ahi.

Kumpipa Arteksersa’ Laikhak

¹¹ Ezra kianga Kumpipa Arteksersa’ laikhak kawpi hiai ahi: Ezra bel siampi lah hi, sinsakpa lah hi ahi. Amah zaw Tangtawn Toupa’n Israel adinga a thupiakte leh thusehte tawh kisaia siam mahmah ahi.

¹² Arteksersa, kumpipate’ kumpipa’n van Pathian’ Dan sinsakpa, siampi Ezra kiang ah lai kon gelh hi.

Chibai!

¹³ Ka thuseh hiai ahi. Ka kumpigam sunga Isaelte, siampite leh Levite zong nang tawh tona Jerusalema pai nuam peuhmah a pai thei ding uh. ¹⁴ Na khuta om Pathian’ Dan tawh kisai Judah gam leh Jerusalem thu kan dingin kumpipa leh a thuhilhmi sagihte’n nang hon sawl hi. ¹⁵ Tua baan ah, Jerusalema teengpa Israel Pathian adinga kumpipa leh amah thuhilhmite’n manbeia a piak uh ngun leh khamte zong na puak ding ahi. ¹⁶ Babulon gam apan na ngah ngun leh khamte khempeuh tawh, Jerusalema om a Pathian uh inn adinga mipite leh a siampite’ ut thilpiakte tawh zong na pawkhawm ding ahi. ¹⁷ Hiai sumtein bawngtalte, belamtalte leh belamnoupate, an thillatte leh dawn thillatte lei ngeingei inla, Jerusalema na Pathian tempula maitam tung ah laan in.

¹⁸ Nang leh na sanggam Judate’n na Pathian uh deihna bangbangin, pha na sak bangun tua kham leh ngun zatbangte zang un. ¹⁹ Na Pathian un’ tempula biak nadinga na khuta tui-um belsuan hong kipete khempeuh Jerusalema Pathian’ mai ah a kim sipsipin pia in. ²⁰ Thil dang, na Pathian uh’ tempul adinga kisam na puak ding kul om leh kumpipa sum koihna apan na pe thei ding hi.

²¹ Kei Kumpipa Arteksersa

in Luipi gal gama sumkemte khempeuh thu kon pia hi.

Siampi Ezra, tua vaan Pathian’ Dan sinsakpa’ hon nget peuhmah kim sipsipin na pia un. ²² Ngun talen 100 chiang dong, huitbuh kor ^[a] 100, zu bath ^[b] 100, oliv thau bath 100 leh chi bikhiah zah omlouin pia un. ²³ Vaan Pathian in a seh dandan, vaan Pathian’ tempul adingin kihih kim sipsip hen. Banghanga kumpipa’ gam leh a tapate tunga thangpaihna tung ding ahia? ²⁴ Hiai zong na theih ding uh ahi: Siampite, Levite, Lasate, Kongpi ngakte, tempul sawltawlte, ahih kei leh, hiai Pathian’ inna nasem dang kuamah tung ah leiman, siah leh zuaksum tunga siah lak theihna thuneihna na nei kei uhi.

²⁵ Nang Ezra in zong, na Pathian’ pilna na neih bangbangin na Pathian’ dante thei tua Luipi gala om mite khempeuh tunga thudika vaihawm ding thukhen mite leh thubuai sai ding mite sep in. Tua Pathian’ dan theiloute zong sinsak in. ²⁶ Na Pathian’ dan leh kumpipa’ danthuseh zui lou peuhmah, gawtna hiam, sawl-mangna hiam, a neih a lam suhsakna hiam, ahih kei leh, suangkula khumna hiam thuaksak teitei ding ahi, chi-in.

²⁷ I pu i pate’ Pathian Tangtawn Toupa phatin om hen. Ama’n hibanga Jeusalema Tangtawn Toupa’ inn-a pahtawina tut ding lungsim kumpipa lungtanga koihpa, ²⁸ kumpipa leh a thuhilh mite leh a uliante’ maia hibang deihsakna kei hon pepa amah ahi. Tangtawn Toupa ka Pathian’ khut ka tunga om ahih manin, ka kihangsansak a, kei tawh tontou dingin Israelte laka makaite ka kaikhawm hi.