Isai 59

Paite Bible

Khelhna, Kiphuanna leh Tatna

59 NGAI dih, hon hondam

theilou dinga,

Tangtawn Toupa’ ban tom lua

hi lou hi.

Za theilou dinga nangong lua

hi lou hi.

² Ahihhanga, na tatsiatnate un na

Pathian uapan hon khenkhia a,

na khelhnate un a mai liah a,

hon za theilou hi.

³ Ahang bel, na khutte uh sisana

niin a,

na khutzungte uh mawhnain

niin hi.

Na mukte un zuau gen a, na leite un

gitlouh thu gen hi.

⁴ Kuama’n dika thukhenna ngen lou a,

kuama’n diktatna ngen lou hi.

Thunamanlou muang uh a,

zuauthu gen uhi.

Thil gilou suangtuah uh a,

khelhna gahkhia uhi.

⁵ Gul dekpak tuite opkeuh uh a,

maimom len gaan uhi.

A tui ne peuhmah si ding hi.

A tui a kitap chianga gul hong

pawtkhia hi.

⁶ Maimom lente puansilha kimang

thei lou a,

a sepsa ua kikhuh thei lou

ding uhi.

A thilhihte uh gilou a,

a khut ua hiamgamna om hi.

⁷ A khete uh khelhna delha tai a,

mawhneiloute’ sisan suah dinga

kintai hi.

A ngaihtuahte uh thil gilou hi a,

a lampi ua siatna leh

manthatna dim hi.

⁸ Lungmuanna lampi thei lou uh a,

a lampi ua dikna om lou hi.

Amau adinga lamkawi kibawl uh a,

tua lampi zui peuhmah in

lungmuanna mu lou ding hi.

Khelh Kiphuanna

⁹ Tua bang ahih mana, dikna in koute

hon gamlat a,

diktatna in hon banpha lou hi.

Khawvak zong ung a, ngai in,

mialna vive om hi.

Khawvak zong ung a,

Mialsah laka pai hi ung.

¹⁰ Mittaw banga, baang zut ung a,

mitbei banga pai nading

maimai hi ung.

Suntang lai nangawna kisui ung a,

mial laka pai bang hi ung.

Mihatte laka misi bang hi ung.

¹¹ Vompi banga ham vomvom ung a,

vakhu banga thuum hi ung.

Dikna zong ung a, om lou hi.

Hotdamna zong ung a,

batphak hi lou hi.

¹² Na maia ka tatleknate uh tam a,

ka khelhnate un hon

mawhpaih hi.

Ka tatleknate un hon ompihden a,

ka tatsiatnate uh thei hi ung.

¹³ Tangtawn Toupa tunga talek leh

zuau gena,

ka Pathian uh pialmangsana

nuaisiahna leh helna gen ung a,

lungsunga zuauthu paai ung a,

genkhia hi ung.

¹⁴ Dikna kiheimang a, diktatna

gamlapi-a om hi.

Thutak konglaia kia a, diktatna

hong lut thei lou hi.

¹⁵ Thutak muhphaka om lou a,

thil gilou taisante lah

a thuak lama pang uhi.

Zion Tanpa

Tangtawn Toupa’n dika thukhenna

om lou hi, chih mu a,

lungkim lou hi.

¹⁶ Ama’n en a, kuamah om lou,

kuamah a kaala palaia

thuumsak ding mi omlouh

lamdang sa lua hi.

Tua bang ahih mana, amah adinga

ama’ bantha maha hotdamna

kibawl a, ama’ diktatna maha

amah kitungding hi.

¹⁷ A diktatna awmphawin silh a,

hotdamna siklukhu khu a,

phulakna puansilhin nei a,

phatuamngaihna puanakpi-in

silh hi.

¹⁸ Ama’n amaute a thilhih bang ua

thuk ding a,

a langte tunga thangpaihna,

a melmate tunga thukna

tun ding a,

tuikulh gamte thuk sipsip

ding hi.

¹⁹ Tumlam apan mite’n Tangtawn Toupa’

min lau ding uh a,

suahlam apan mite’n a thupina

zahtak ding uhi.

Tuikhang lian banga melma hong

kuan chianga,

Tangtawn Toupa’ Kha in amah

doua taimangsak ding hi.

²⁰ Zion ah Tanpa hong tung ding a,

Jakob inn sunga tatlekna kisikte

tunga hong tung ding hi,

Tangtawn Toupa’n chi hi.

²¹ Tangtawn Toupa’n: Kei ka hih leh, amaute tawh kala ka thukhun hiai ahi. Na tunga ka Kha om leh, na kama ka koih ka Thu in tu apan tangtawnin na kam a nuse kei ding a, na suante leh a suansawnte uh kam zong a nuse kei ding, Tangtawn Toupa’n a chi, chi hi.