Santiago 5:1-6

Magandang Balita Biblia

Babala sa mga Mapang-aping Mayayaman

5 Pakinggan ninyo ito, kayong mayayaman! Tumangis kayo at humagulgol dahil sa mga kapighatiang darating sa inyo. ² Bulok^(A) na ang inyong mga kayamanan at kinain na ng mapanirang insekto ang inyong mga damit. ³ Kinakalawang^(B) na ang inyong ginto at pilak, at ang kalawang ding iyon ang magiging katibayan laban sa inyo at parang apoy na tutupok sa inyong laman. Iyan ang kayamanang inimpok ninyo para sa mga huling araw. ⁴ Sumisigaw ang mga manggagawa sa inyong mga bukirin dahil hindi ninyo ibinibigay ang kanilang mga sahod. Umabot na sa pandinig ng Panginoong Makapangyarihan sa lahat ang mga hinaing ng mga mang-aani na inyong inapi! ⁵ Nagpasasa kayo sa kalayawan at karangyaan dito sa lupa. Nagpataba kayong parang mga hayop na kakatayin. ⁶ Hinatulan^(C) ninyo at ipinapatay ang taong matuwid na hindi lumalaban sa inyo.