Joshua 4

Paite Bible

4 TUA nam buppi in Jordan lui a galkah khit takun, Tangtawn Toupa'n Joshua kiang ah thu a gen a: ² Mipite lak apan mi sawmlenih, nam khat apan khat zel, telkhia inla, amaute thu pia inla: ³ Siampite’ khe in a sikna mun, Jordan lui laizang apan suang sawmlenih lain pua unla, tuzan na giah nading uh giahphual ah nga un, chi-in hilh in, a chi hi.

⁴ Tua bangin, Joshua in Israelte lak apan a sehsa mi sawmlenihte, nam khat apan khat zel, a samkhawm a, ⁵ amaute kiang ah: Tangtawn Toupa, na Pathian uh’ singkuang mai ah, Jordan lui laizang ah vapai unla, mi chih in suang khat tek, Israel nam zahzah, na liangun vapua un. ⁶ Tua bel, noute laka chiamtehna ahih den theih nading ahi. Tunung chiangin, na tate un: Hiai suangte bang na chihna uh hiam? chi-in hon dong ding uhi. ⁷ Tua hun chiangin, noute’n: Pathian in Tangtawn Toupa’ thukhun singkuang mai ah Jordan luite a sattan hi. Jordan lui a galkah laia Pathian in Jordan tuite a kantatsak manin, Israel suante adinga theihgigena hiden dinga hiai suangte ka koih uh ahi, chi-in amaute na hilh ding uhi, a chi hi.

⁸ Tua bangin, Israel suante’n Joshua, thupiak bangbangin a hihta uhi. Tangtawn Toupa’n Joshua a hilh bangbangin, Jordan lui laizang apan suang sawmlenih, Israel nam zahzah, a pua uh a, a giahphual uah a nga uhi. ⁹ Joshua in thukhun singkuang zawng siampite dinna Jordan lui laizang ah suang sawmlenih dang a chiangkhawm hi. Tua suangte tua lai ah tuni dongin a om uhi.

¹⁰ Mipite’ hih dinga Tangtawn Toupa'n Joshua a thupiak peuhmah a kim sipsipa mipite’n a hih khit mateng uh, singkuang zawng siampite bel Jordan lui laizang ah a ding uhi. Mosi in Joshua a thuhilh bangbanga kihih ahi. Tua bangin, mipite a kinawh uh a, Jordan lui a galkahta uhi. ¹¹ Amaute khempeuh a galkah khitun, Tangtawn Toupa’ singkuang leh siampite, mipite’ mitmuhin a galkahta uhi. ¹² Reuben’ suante apan, Gad’ suante apan, leh Manase suan nam kimkhat apan mite bel Mosi in amaute a thuhilh bangin, Israel suante mai ah a galkah uh a, galdou dingin a kigalvan uhi. ¹³ Kigalvansa mi 40,000, Tangtawn Toupa’ mai ah gal dou dingin, Jerikho phaizang ah a galkah uhi.

¹⁴ Tua ni-in, Tangtawn Toupa’n Israelte khempeuh’ mitmuhin Joshua a pahtawi hi. Amaute’n Mosi a zahtak bangun Joshua zong a damsung teng a zahtak uhi.

¹⁵ Tangtawn Toupa'n Joshua kiang ah: ¹⁶ Theihpihna singkuang zawng siampite, Jordan lui apan hong paitou dingin thu pia in, a na chita hi.

¹⁷ Tua bangin, Joshua in siampite kiang ah: Jordan lui apan hong paitou un, chi-in thu a napia hi.

¹⁸ Tua khitin, Tangtawn Toupa’ thukhun singkuang zawng siampite, Jordan lui apan hong paitou uhi. Siampite’ khete’n leihul a sik takin, Jordan lui tui hong kichih kik a, a ma-a bangin luipiau dimletin tui a luang hi.

¹⁹ Kha khatna, a ni sawm ni-in, mipite Jordan lui apan a paitou uh a, Jerikho suahlam panga om, Gilgal mun ah giahphual a sat uhi.

²⁰ Gilgal ah Joshua in, Jordan lui apan a puakkhiak uh, tua suang sawmlenihte a chiangta hi. ²¹ Israelte kiang ah: Tunung chianga na suante un a pate uh kianga: Hiai suangte bang na chihna uhiam? chi-a a dot chiangun, ²² Israelte leihula hiai Jordan lui galkah uh eive, chi-in amaute na hilh un. ²³ Tangtawn Toupa, na Pathian un noute na galkah mateng uh, na mai uah Jordan tui a kangtatsaka ahi. Tangtawn Toupa, na Pathian un i galkah mateng uh, i maia Tuipi San a na kantatsak bangbangin, Jordan lui a kangtatsak hi. ²⁴ Leitung mi khempeuh in, Tangtawn Toupa’ khut thahat dan a theih nading uleh, noute’n Tangtawn Toupa, na Pathian uh na lau den theih nadingun, Ama’n hiai a hih ahi, a chi hi.