Baptispa Johan^(A)

1 PATHIAN’ Tapa, Jesu Khrist tawh kisai tangthupha kipatna hibang ahi:

² Kamsangpa Isai’ laibu sung ah:

Ngai in, na maia ka thangkou

sawl ding ing a,

ama’n na maia na lampi

bawlkhol ding hi.

³ Gamdai-gamkeua kikoupa’

aw in:

Toupa ading lamlian sial unla,

A lampite tangsak

un, chi hi,

chi-in a kigelh hi.

⁴ Tua bangin, Johan hong pai a, gamdai-gamkeu ah a baptis a, khelhna ngaihdam nadingin kisika lungheina baptisna thu a gen hi. ⁵ Amah kiang ah Judia gam teng leh, Jerusalem khawmi khempeuh hong pai uh a, a khelhnate uh a pulak uh a, Johan in Jordan Lui ah amaute a na baptis hi. ⁶ Johan in sangawngsau mul puan a silh a, savun kawng¬gakin a kawng a gak a, gambe leh gamlak khuaizu an in a nei hi. ⁷ Ama’n: Ka nunga hong paipa zaw kei sanga hatzaw ahi. Kun-a ama’ khedap khau phel ding nangawn chin lou ka hi. ⁸ Ke’n tuiin kon baptis a, ahihhangin, ama’n Kha Siangthoua hon baptis ding ahi, chi-in thu a gen hi.

Johan’ Thugen

⁷ Ama’ khuta baptisna tang dingin mipi tampi’n hong zuan uhi. Johan in bel amaute kiang ah: Nou, gul suante! Hong tung ding thangpaihna taisan dingin kua’n hon vauhilh ahia? ⁸ Lungheina tawh kikhom gah suah ve ua. Koute’ Pa Abraham ahi, chi-in kingaihsun kei un. Ko’n hilh ahi: Pathian in hiai suangte nangawn, Abraham’ suante a dingsak thei ahi. ⁹ Pathian in singbul teng ah heipi a taakta. Gah hoih suah lou singkung peuhmah a phuk ding a, meikhuk ah a khul ding, a chi hi.

¹⁶ Johan in amaute khempeuh a dawng a: Ke’n noute tuiin kon baptis ngeitak a, ahihhangin, kei sanga a vanglian zaw hong pai ding ahi. Kei zaw ama’ khedap khaute phel ding nangawna chin lou ka hi. Ama’n zaw Kha Siangthou leh meia hon baptis ding ahi.

¹⁷ Ama’n a khut ah phazah a tawi a, a phual a hahsiang ding a, tua khit chiangin phazahin buh a zapsiang ding a, buhtakte a buhpang ah a koih ding. Buhsite bel mei mittheilou sung ah a khul ding, a chi hi.