Baptispa Johan^(A)

3 TUA laiin, Judia gamdai-gamkeu ah Baptispa Johan, Pathian thugenin hong pai hi. ² Ama’n: Kisikin lunghei un, vantung kumpigam hong naita hi, a chi hi. ³ Hiai mi ahi, kamsangpa Isai tungtawna:

Gamdai-gamkeua kikoupa’ aw in:

Toupa ading lamlian sial unla,

ama’ lampite tangsak un,

chi hi,

chi-a a na kigenpa.

⁴ Johan in sangawngsau mul kigan puante a silh a, savun kawnggakin a kawng a gak a, a annek lah gambe ^[a] leh gamlak khuaizu ahi. ⁵ Tua laiin, Jerusalem khawpi apan leh Judia gam leh Jordan lui kim gam apan mite amah kiang ah hong pai uh a, ⁶ a khelhnate uh a pulak uh a, Johan in Jordan lui ah a maute a na baptis hi.

Baptispa Johan’ Thugen^(B)

⁷ Ama’n ama’ baptisna muna Farisaite leh Sadukaite tampi hong pai a muh takin, amaute kiang ah: Nou gulsuante! Hong tung ding thangpaihna apan taai dinga kua’n noute hon vauhilh ahia? ⁸ Kisika lungheina tawh kikhom gah suah ve ua. ⁹ Kapa uh Abraham’ ahi, chi-in kingaihtuah kei un. Kon hilh ahi: Pathian in hiai suangte nangawn Abraham’ suante-a dingsak thei ahi. ¹⁰ Pathian in sing bul teng ah heipi a taakta. Gah hoih suah lou singkung peuhmah a phuk ding a, meikhuk ah a khul ding hi.

¹¹ Ke’n kisika lungheina tawh kisaiin noute tuiin kon baptis ngeitak a, ahihhangin, ka nunga hong paipa zaw kei sanga hatzaw ahi. Ama’ khedap tawi taak zong hilou ka hi. Ama’n zaw Kha Siangthouin leh meiin hon baptis ding ahi.

² Tua hun lai mahin, Ana leh Kaiafa, siampilian a hikhawm uhi. Hibang hun laitakin, gamdai-gamkeu ah Zekharia’ tapa Johan kiang ah Pathian’ thu hong tung hi. ³ Amah Jordan lui kiim gam teng ah a pai a, khelhnate ngaihdam nadingin kisika lungheina baptisna thu a gen hi. ⁴ Kamsang Isai laibu-a kigelh bangbang ahi. Tua ah:

Gamdai-gamkeua kikoupa’ aw in:

Toupa ading lampi sial unla,

ama’ adingin lampi tangte bawl un.

⁵ Luikuam teng vuhdim hi ding a,

mual leh tang teng kaihniam

hi ding hi.

Lamkawite hihtang hi ding a,

lampi phokte mamsak hi

ding hi.

⁶ Mi khempeuh in Pathian’

hotdamna mu ding uhi,

chi hi,

chi-in a kigelh hi.

Johan’ Thugen

⁷ Ama’ khuta baptisna tang dingin mipi tampi’n hong zuan uhi. Johan in bel amaute kiang ah: Nou, gul suante! Hong tung ding thangpaihna taisan dingin kua’n hon vauhilh ahia? ⁸ Lungheina tawh kikhom gah suah ve ua. Koute’ Pa Abraham ahi, chi-in kingaihsun kei un. Ko’n hilh ahi: Pathian in hiai suangte nangawn, Abraham’ suante a dingsak thei ahi. ⁹ Pathian in singbul teng ah heipi a taakta. Gah hoih suah lou singkung peuhmah a phuk ding a, meikhuk ah a khul ding, a chi hi.

¹⁰ Mipite’n: Tua bang ahih leh, koute’n bang ka hih uh kul ahia? a chi uhi.

¹¹ Johan in amaute a dawng a: Puanaktung nih nei peuhmah in a neilou mi hawm henla, an nei peuhmah in zong tua bangin hih hen, a chi hi.

¹² Siahdongte zong baptisna tang dingin hong pai uh a: Sinsakpa, koute’n bang ka hih ding ua le? hong chi uhi.

¹³ Johan in amaute kiang ah: Siah don ding bikhiah zah val ngiat kei un, a chi hi.

¹⁴ Tua baan ah, sepaih pawl khat in amah kiang ah: Koute’n lah bang ka hih ding ua? a chi uhi.

Ama’n amaute a dawng a: Vauna tawh kuamah dangka sut kei unla,

a dikloupi-in kuamah ngawh kei unla, na khasum utawh lungkim un, a chi hi.

¹⁵ Tua mipite’n Mesia na lamen ahi uh a, hiai Johan, Mesia hi kha ding hiam, hilou ding, chih lungsung ah a ngaihsun uhi. ¹⁶ Johan in amaute khempeuh a dawng a: Ke’n noute tuiin kon baptis ngeitak a, ahihhangin, kei sanga a vanglian zaw hong pai ding ahi. Kei zaw ama’ khedap khaute phel ding nangawna chin lou ka hi. Ama’n zaw Kha Siangthou leh meia hon baptis ding ahi.

Johan’ Theihpihna^(A)

¹⁹ Judate’n Jerusalem apanin siampite leh Levite Johan kiang ah a sawl uh a: Nang kua na hia? chi-in a vadongsak uhi. Tua laitak maha ama’n hibang theihpihna thu na

gen ahi. ²⁰ Ama’n imlouin a gen a: Kei Khrist ka hi kei, chi-in a kiphuang hi.

²¹ Amaute’n: Ahih leh kua na hia? Elija na hi maw? chi-in a dong uhi.

Ama’n: Ka hi kei, a chi hi.

Amaute’n: Tua Kamsangpa na hi maw leh? a chi uh a, ama’n: Ka hi kei, chi-in a dawng hi.

²² A tawpin amaute’n: Kou hon sawlte ka dawn theih nadingun hon hilh in. Kua na hia? Nang kua kichi na hia? chi-in a dong uhi.

²³ Ama’n: Kamsangpa Isai gen banga Toupa adingin lampi tang bawl un chi-a gamdai-gamkeua kikoupa’ aw ka hi, a chi hi.

²⁴ Tua mite bel, Farisaite’ sawl ahi uhi. ²⁵ Amaute’n: Khrist lah hilou, Elija lah hilou, tua Kamsangpa lah hilou na hih nung banghanga baptis na hia leh? chi-in a dong uhi.

²⁶ Johan in a dawng a: Ke’n bel tuiin ka baptis a, ahihhangin, na lak uah na theih louh uh mi khat a ding hi. ²⁷ Amah ahi ka nunga hong paipa. Kei zaw ama’ khedap khaute phel dingin zong ka ching kei hi, a chi hi.

²⁸ Hiai thilte a tunna bel, Johan in a baptisna Jordan lui gala Bethani ^[a] khua ah ahi.

Khrist Baptis Tanna^(B)

²⁹ A zing chiangin, Johan in, Jesu amah lam manawha hong pai a mu a: En un, tua Pathian’ Belamnou, leitung khuavannuai’ khelhna lamangpa! ³⁰ Ka nunga hong paipa, kei ma-a omsa mawng ahih manin, kei sanga tungnung zaw ahi, chi-a, a thu ka genpa hiai ahi. ³¹ Keimah tak in amah ka na thei kei a, ahihhangin, tuia baptisa kong paina san bel, Pathian in Israelte kianga amah a latsak nading ahi, a chi hi.

³² Tua baan ah, Johan in hibangin theihpihna thu a gen a: Vantung apanin Kha, vakhu banga hong kumsuk ka mu a, ama’ tung ah a omden hi. ³³ Tuia baptis dinga hon sawlpa’n: Kua hita leh, Kha hong kumsuk a, a tunga a omdennapa ahi Kha Siangthoua baptis dingpa, chi-in hon hilh kei leh, amah thei lou ding ka hi. ³⁴ Tu’n zaw ka muta a, hiai Pathian’ Tapa ahi, chih ka theihpih hi, a chi hi.