Phatnalate 148

Paite Bible

Thilsiam Khempeuh in Toupa Phat

148 TANGTAWN Toupa phat un!

Vaante apan Tangtawn Toupa

phat un,

tung sang ah amah phat un.

² Nou a vansawltakte khempeuh in

amah phat un.

³ Ni leh khapi in amah phat un,

aksi taangte khempeuh in

amah phat un.

⁴ Vaan sangpente’n amah phat un,

tung vana tuite’n

amah phat un.

⁵ Amaute’n Tangtawn Toupa’

min phat uhen.

Ama’n thu pia a, amaute

siama om uh hiven.

⁶ Ama’n amaute amau’ mun teka

koihden a,

ama’n a mangthang ngeilou

ding thuseh pia hi.

⁷ Nou tuipi ganhing liante leh tui

thukpite’n leitung apanin

Tangtawn Toupa phat un.

⁸ Khawphia leh gialpi, vuk leh

meipite,

a thumang huihpi,

⁹ mualsangte leh mualniamte

khempeuh,

singkung gahtheite leh sidar

singkung khempeuh,

¹⁰ gamsate leh gantate khempeuh,

bokvak ganhingte leh

tungleng vasate,

¹¹ leitung kumpipate leh namte

khempeuh,

makaite leh leitung

thukhente khempeuh,

¹² tangvalte leh nungakte, teekte

leh naupangte khempeuh in

Tangtawn Toupa phat un!

¹³ Amaute’n Tangtawn Toupa’ min

phat uhen, ama’ min kia

pahtawi taak hi ahi.

A thupina lei leh vante’ tunglam

peka om ahi.

¹⁴ Ama’n a mite adinga kii

tungkhia a,

a misiangthoute khempeuh phata

omna tua hi a, a lungsunga

manpha Israel phata omna zong

tua hi ahi.

Tangtawn Toupa phat un!