Pianchilna 33

Paite Bible

Jakob leh Esau Kituahna

33 JAKOB a khawdak a, Esau, a mi 400 -te tawh hong pai a mu hi. Ama’n a tate teng, Lea, Rakhel leh sila numeite lak ah a hawm a, ² sila numeite leh a tate uh a masasak a, tua nung ah, Lea leh a tate a zomsak a, Rakhel leh Josef a nunungsak hi. ³ Amah madawkin a vapai a, a sanggampa lam ngain, sagihvei leisi-in a kun hi.

⁴ Ahihhangin, Esau bel, Jakob tuak dingin hong tai a, amah a pom a, a ngawngkawi a, a tawp a, a nihun a kap uhi. ⁵ Tua khitin, Esau a khawdak a, tua numeite leh tate a mu a: Hiai na tonpihte kuate ahi ua le? a chi hi.

Jakob in a dawng a: Pathian in hehpihtaka na silapa a piak tate ahi uhi, a chi hi.

⁶ Sila numeite leh a tate un hon naih uh a, Esau’ mai ah hong kun uhi. ⁷ Tua khitin, Lea leh a tate hong pai uh a, tua bangin hong kun uhi. A nunungpenin Josef leh Rakhel hong pai uh a, amaute zong Esau’ mai ah hong kun uhi.

⁸ Esau in: Hiai ganhon hong kihawl kon tuahte bang na chihna ahia? a chi hi.

Jakob in: Ka toupa aw, na maipha ka zonna ahi, a chi hi.

⁹ Ahihhangin, Esau in: Ka sanggam aw, ke’n ganhon hauta veng e. Na neih teng nang adingin neiden in, a chi hi.

¹⁰ Jakob in: Hehpihtakin tua zaw hi kei hen aw. Na maipha hon musak na hih leh, hiai ka thawnpiakte hon sang in. Deihsakna tawh kei non santak manin, na maitang ka muh, Pathian’ maitang mu bang ka hi. ¹¹ Pathian ka tung ah a siam a, ka deihkhop ka nei a, hehpihtakin, thawnpiak hong kipia sang mahmah in, a chi hi. Tua banga Jakob in a piak teitei manin, Esau in thawnpiakte a sang hi.

¹² Tua khitin, Esau in: Paita ni. Ken hon makaih ning, a chi hi.

¹³ Ahihhangin, Jakob in amah kiang ah: Naupangte lah a neu lai uh a, noungek nei belampi leh kelpite leh ganpite ka kep a kul, chih ka toupa’n na thei hi. Ni khat lel zong kihatpaipih leh, ganhonte si ding uhi. ¹⁴ Tua bang ahih manin, na silapa’ mai lam ah, ka toupa na pai masa in. Kei zaw Seir muala ka toupa kon tuah mateng, ganhonte leh naupangte hat dandanin, awlawlin hong pai ning, a chi hi.

¹⁵ Esau in: Tua bang ahih leh, ka mite pawl khat hon nutsiat ning, a chi hi.

Jakob in: Bang kul se ding ahia? Ka toupa’n na maipha non muhsak kiching khin lel hi, a chi hi.

¹⁶ Tua ni-in, Seir lam zuan kik dingin Esau a kipankhia hi. ¹⁷ Ahihhangin, Jakob bel, Sukoth ^[a] ah a pai a, tua ah amah adingin in a lam a, a gantate adingin buktate a lam hi. Tua hang mah ahi, tua mun Sukoth a kichih.

¹⁸ Tua banga Jakob, Padan Aram apan hong paikhiak nungin, Kanan gama Shekhem khawpi bittakin a tung a, tua ah khawpi kigalmuhna ah, giahphual a sat hi. ¹⁹ Ama’n Hamor’ tate apanin, nguntang 100 in mun khat a lei a, tua ah puanbuk a kai hi. Hamor bel, Shekhem’ pa ahi. ²⁰ Tua ah maitam a dawh a, tua mun min dingin, El Elohe Israel ^[b] a sa hi.